Віцебскі тэатр «Лялька», які да гэтага працаваў толькі на беларускай мове, стаў ставіць спектаклі па-руску. 25 кастрычніка 2025 года там адбылася прэм’ера пастаноўкі «Дзяўчынка і мядзведзь», што ідзе па-руску.
Спектакль паставіла актрыса Дар’я Зімніцкая, якая нядаўна стала мастацкім кіраўніком тэатра.
Тэатр «Лялька» быў створаны ў 1986-м. З таго часу гэтую пасаду займаў Віктар Клімчук, пры якім спектаклі ставіліся толькі на беларускай мове. У 2024-м яму прыйшлося сысці са сваёй пасады. Як паведамлялі рэдакцыі нашыя крыніцы, Клімчука абвінавацілі ў невыкананні планаў, якія стаяць перад тэатрам. Пры гэтым за гэтую задачу нясе адказнасць не мастацкі кіраўнік, а дырэктар калектыва. Клімчуку вынеслі вымову, што і прывяло да яго сыходу.
Да прэм’еры спектакля «Дзяўчынка і мядзведзь» сярод 28 прафесійных тэатраў Беларусі ўсяго чатыры працавалі выключна на беларускай мове. Купалаўскі і РТБД (у Мінску), Коласаўскі і «Лялька» (у Віцебску). Цяпер такіх тэатраў засталося трое. Акрамя таго, у жніўні 2025-га пра планы ставіць спектаклі і на рускай заявілі ў РТБД. У выпадку рэалізацыі гэтай ідэі ў краіне застанецца ўсяго два беларускамоўныя калектывы.
